Hebo un accidente d’importancia na estrada de los llagos de Cuadonga que nun acabó en traxedia por namás qu’otra medio vuelta campana. De manu, naide tien la culpia: la empresa aseguraba que la razón nun taba nel coche, los profesionales que nun taba nel xofer y’l gobiernu asturianu que nun taba na vía. Si eso ye asina, nun pasaría nada: un simple accidente como hai tantos en tantos sitios. Pues entós nun sabemos cómo desplicar que, dos díes dempués, Alejandro Calvo, conseyeru de fomentu, diz que “van revisase tolos vehículos con autorizaciones pa evitar qu’haiga un mal usu d’elles”. Y tres díes dempués deciden prohibir l’accesu a vehículos privaos nel branu y en díes de gran afluencia. Al empar Raquel Casado, de la Dirección Xeneral de Tráficu diz que “esta ye una carretera complexa y pelligrosa pa cualisquiera y entá más pa vehículos pesaos”. Pela so parte, Javier de los Ríos, d’Alsa, desplica que “la de Cuadonga ye una estrada singular que requier un tratu diferencial”. ¡Vaya!, que dalgún problema “estructural” sí que paez qu’hai. De fechu, hai yá venticincu años qu’el conceyu de Cangues d’Onís prohibiera subir autobuses a los llagos, non por un accidente, sinón porque la invasión turística amenazaba l’entornu natural. ¡Hai venticincu años!, cuando’l conseyeru Calvo tenía 23 años y’l presidente Barbón 19. Ye de suponer que dalgo estudiaríen dende entós.
Lo que ye cierto como la lluz del día ye que n’Asturies tenemos un modelu turísticu y un sistema tresportes insostenibles y pelligrosos.
Ye más: nuna carta pública de cincuenta profesionales del tresporte podemos lleer que “llevamos años quexándomos pol escesivu tráficu (...), cada añu observamos que nun tomen medida dalguna pa ameyorar la xestión (...), les cunetes tan reventaes práuticamente na so totalidá (...) el tramu ente Enol y La Ercina ta nun estáu llamentable (...), hai un gotéu costante de coches baxando en grupu, especialmente ente les diez y media y la una, cuando más autobuses suben”. Eso sí, Alsa diz qu’esti siniestru nun se diera cuando se cruzaben dos autobuses, lo que puede ser verdá, pero que los cruces en curves estreches, cerraes y ensín cuneta son normales cada poco tiempu tamién ye verdá.
¿Nun sería más llóxico ameyorar la carretera, poner un tope de visitantes y dotar al parque d’un serviciu públicu de microbuses que, evidentemente, va ser rentable?
Lo que ye cierto como la lluz del día ye que n’Asturies tenemos un modelu turísticu y un sistema tresportes insostenibles y pelligrosos. En dengún país medianamente bien xestionáu se ven les coses que vemos equí nun espaciu que, teóricamente, tien la máxima proteición llegal. Pero con una política que, lloñe de daprender de los desastres d’otros llugares, sigue’l camín d’un turismu masivu que ta convirtiéndose nun problema de primer orde les coses van dir a peor. A la xentrificación y asaltu a les villes y ciudaes, a la apropiación xeneralizada del patrimoniu material por parte d’intereses foriatos, a la masificación de los entornos históricos y culturales, vien unise una depredación del mediu natural, exemplarizable en Los Picos d’Europa, con atascos de tráficu y docenes d’autobuses nun parque nacional, y miles de persones invadiendo ecosistemes fráxiles. Esi ye l’asuntu y ehí ta’l debate. Pero habrá qu’esperar a que tengamos venti o trenta muertos d’una tacada pa que dalguién faiga dalgo.
¿Nun sería más llóxico ameyorar la carretera, poner un tope de visitantes y dotar al parque d’un serviciu públicu de microbuses que, evidentemente, va ser rentable?
Agora reábrese’l debate sobro’l tren cremallera, esto ye, más pavimentación y más obra civil nel parque nacional y, evidentemente, manteniendo la carretera que, llóxicamente, seguirá utilizándose. Tren y carretera: más masificación aparentando menor impautu. Diz el presidente qu’esi tren cremallera sería una bona iniciativa, “sobro tóo pa desestacionalizar el turismu”, ¿Qué doutrina económica sigue Barbón pa llegar a la conclusión de que la desestacionalización vien determinada pol tipu tresporte? ¿Los turistes deciden cuándo venir de vacaciones a Asturies en función de si a Cuadonga hai tren, autobús, helicópteru o zepelín? Y resulta qu’al final, Los Picos d’Europa van ser la rexón asturiana con meyor serviciu ferroviariu, mientres la rede pública muerre miserablemente.
Porque tamién hai equí una decisión privatizadora. ¿Nun sería más llóxico ameyorar la carretera, poner un tope de visitantes y dotar al parque d’un serviciu públicu de microbuses que, evidentemente, va ser rentable? ¿O ye qu’el monopliu d’Alsa ye dalgo sagrao y, si nun lu tien per carretera, que lu tenga per vía férrea? L’otru gran sector del oligopolismu asturianu, la patronal turística, ta tamién a lo mesmo. El so presidente, Álvarez Almeida, entrugaba retóricamente sobro lo del tren: “si nel mundiu los hai, ¿por qué n’Asturies non?” ¡Vaya razonamientu! ¿Y si n’África trabayen neños de siete años nes mines, porqué n’Europa non? Pues, yendo a lo primero, porque nunos casos nun hai carretera y notros casos fueron soluciones de los años cincuenta, con problemes distintos y ensín saber de los sos efeutos perversos. Amás, munchos países dexaron de recurrir a ello, como Suiza y Austria, ensín dir más lloñe, países bastante más desarrollaos y que tienen n’alta montaña un recursu turísticu primordial. Ye que nesos países nun tienen la suerte d’un gobiernu como l’asturianu, una patronal turística como l’asturiana y un monopoliu priváu de tresporte como l’asturianu.
