Afirmen les nueses cámares de comerciu qu’Asturies va ser determinante na estructuración y’l furrulamientu del arcu atlánticu. Nun lo teo yo tan claro, viniendo d’instituciones que lleguen vaticinar qu’el muséu de los premios reales, príncipe o princesa según cuadre, va representar lo mesmo qu’el Guggenheim pa Bilbao. “Determinar” significaría, nesti casu, como, en xeneral en ciencies sociales, “ser la causa de que dalgo ocurra”. Agora téngolo menos claro tovía. Vamos ver como mos vien la historia.
Ye’l gobiernu vascu el verdaderu “determinante” d’esti arcu atlánticu
L’arcu atlanticu ye una opción económica nel actual desendolcu de la Unión Europea que ta formada por Galicia, Asturies, Castiella y Llión, Portugal Norte, Cantabria, País Vascu, Navarra y Aquitania. Ye un ária periférica que representa’l 4,25 por cientu de la población europea y que cada añu que pasa pierde pesu en tolos sentíos y valoraciones.
Tien esti arcu atlánticu baxa natalidá, gran avieyamientu, baxa competitividá, un PIB perbaxo la media la Unión Europea, renta industrial tamién mui perbaxo y una industria manufautorera con mui baxu nivel teunolóxicu. Sí que tien como positivo un mediu ambiente muncho menos deterioráu, una bona oferta universitaria y una bona cadarma de sanidá pública.
Pero nada se fixo, nada n’absoluto, ata qu’el País Vascu tomara conciencia de qu’aquello del arcu atlánticu-y venía mui bien. El proyeutu nel que güei tamos respuende al impulsu institucional d’Íñigo Urkullu. El gobiernu de Vitoria comprendiera bien ceo que taba nel centru d’una exa de desendolcu, por cuanto yera enllaz del coreor llusu-francés y madrilanu-catalán. Namás que-y faltaba ser centru del gallegu-astur-llionés. Y púnsoxe a trabayar. L’autual proyeutu d’arcu atlanticu ye frutu d’un estudiu, mui bonu, por cierto, del Institutu Vascu de Competitividá, dependiente de la Universidá de Deusto.
Xixón, el centru neurálxicu d’Asturies d’esti proyeutu, en manes güei de la reacción más atrasada y antieuropeísta, que va suprimir drechos individuales y sociales, que va perseguir la llingua propia, que va incumplir voluntariamente l’axenda 20-30, que va revertir la peatonilización, que va volver facer de la tortura d’animales una fiesta popular, etcétera,., ¿qué van vender?
Ye’l gobiernu vascu el verdaderu “determinante” d’esti arcu atlánticu. Los gobiernos asturianos y los empresarios asturianos nunca ficieron nada, pero nada de nada. Col so provincianismu paletu namás que miraben a Madrid, con obsesiones como l’AVE o los aviones a Barajas, cuando al norte taba’l gran retu y la gran posibilidá. Ye más, nesi arcu atlánticu les custiones culturales y referenciales son mui importantes. Esi “arcu” ye una comunidá cultural, non namás qu’económica, como lo ye la del arcu mediterrániu. Pero eso n’Asturies suena a separatismu, ideoloxización y asturiano obligatorio.
Agora vamos dir a peor. Les cámares de comerciu, qu’acaben de descubrir lo que se sabe dende hai cuarenta años, quieren “determinar” el procesu. Pues non. Los empresarios asturianos y’l mesmu gobiernu tendrán que apechugar colo que digan los gobiernos vascu, gallegu y aquitán. Va ser complicao. Dexar de recibir ordes de Madrid y de xugar estratexes mediterránies va ser complicao. Seguramente nun sabrán adautase y, otra vuelta dende hai cincuenta años, descolgaranse del tranvía y ésti pasará de Compostela a Vitoria y lluéu a Burdeos, y d’ehí a París y Berlín. A ellos con dir a Madrid y, como muncho, a Sevilla, abásta-yos.
Y tovía puede ser peor. Xixón, el centru neurálxicu d’Asturies d’esti proyeutu, en manes güei de la reacción más atrasada y antieuropeísta, que va suprimir drechos individuales y sociales, que va perseguir la llingua propia, que va incumplir voluntariamente l’axenda 20-30, que va revertir la peatonilización, que va volver facer de la tortura d’animales una fiesta popular, etcétera,., ¿qué van vender?. Ye que nun escaezamos que, na Unión Europea, nos criterios de financiación tamién entren estos valores y cada vuelta con más pesu nel polinomiu.
Esperemos qu’el gobiernu vascu, que trabaya pal so pueblu como ye lo nomal, salga cola suya. Dalgo va beneficiar a tou esi “arcu” y, de pasu, a Asturies. Ye que si dalgo esperamos de los nuesos gobernantes y de los nuesos empresarios val más que mos sentemos n’antoxana con una botella sidra y cantemos una tonada.
