Los chigres de los pueblos tan pesllando, ún tres d’otru. La xubilación de los propietarios, la marcha de los fíos, camín d’una ciudá que-ys ofrez meyores horizontes pa los neños, por nun decir los únicos posibles, les incompatibilidaes absurdes ente ser agricultor o ganaderu y tener una tabierna na parroquia... Y con ello desapaecen los centros comunales, los únicos llugares que nel mundiu rural permiten una socialización, una vida en común, especialmente nes llargues iverneres.
Teruel Existe acaba de llevar al Congresu una proposición de llei pa incluyir estos negocios rurales na más xeneral Llei d’Economía Social y dotalos de ventaxes fiscales, sociales y alministratives
El pieslle’l chigre anticipa la muerte la comunidá. Viérase bien y con aceleración cuando la pandemia 2019-2022. Un chigre nun ye sólo un llugar nel que tomar un par de botellines, non. Ye onde llega’l periódicu, el de papel, importante pa comunidaes que nun tan mui enganchaes a les redes dixitales; onde se ven los partíos de fúbol que son de pago, que son cuásique tóos; onde se xuega la partía y se discute de política; onde tan les esqueles, les feches de vacunación animal, los bandos municipales d’un ayuntamientu igual a venti kilómetros. Ye más, bien que nes elleiciones los partíos políticos llamen a vecinos al chigre pa prometer a les collaciones lo que saben que nun van cumplir. A esi chigre nun van volver nunca, nel supuestu que nes elleiciones siguientes siga esistiendo.
Teruel Existe acaba de llevar al Congresu una proposición de llei pa incluyir estos negocios rurales na más xeneral Llei d’Economía Social y dotalos de ventaxes fiscales, sociales y alministratives. Pero, ye más, podríamos incluyilos nos programes de resiliencia, economía circular, caltenibilidá y, inclusive, nes polítiques de xéneru. Hai décades que nel Reinu Uníu se llexisló nesti sen, estremando ente los pubes en xeneral y los pubes rurales en particular. Ye una vieya tradición anglosaxona la de tratar de forma diferente lo que ye diferente. Pero la España uniforme. mesetaria, romana y afrancesada siempres fuera incapaz d’entender nada.
La propuesta de Teruel Existe siempres se refier al “municipiu”, porque la organización comparte la visión uniforme española. Despliquen na so proposición qu’hai n’España 2.285 municipios de menos de 200 habitantes, el 30 por cientu’l total pero sólo col 0,5 de la población, de la que la metada vive en pueblos ensín bar. Pero esa categorización municipal dexa fuera d’atención a los pueblos asturianos.
Yá cuando, hai unos menses, se discutiera l’asuntu los caxeros y les oficines bancaries, pasara lo mesmo. Nun hai conceyos n’Asturies ensín un caxeru, pero la metada o más de la población d’esos conceyos tienen el caxeru a 25 kilómetros de casa. Nun hai problema de falta de bares en Ponga nin n’Amieva, y hailos en gran cantidá en Llanes y Villaviciosa, pero nes sos parroquies rurales piesllen ún cada añu como poco.
La propuesta de Teruel Existe ye perinteresante y hai qu’aprovechala. Pero nun resuelve los problemes d’Asturies porque la dimensión municipal ye mui diferente a la d’España.
Ye llamativo que nunca los gobiernos d’Asturies se preocuparan d’esto. Y ye llamativo porque, pa ser Asturies un país con tantos y tan dispersos pueblos pequeños, siempres fuera alministráu como si tóo fueran ciudaes, villes mineroindustriales y, dempués, centros turísticos. Nun habrá munchos países democráticos que lleven gobernaos dende siempres por xente que los desconoz, que nun-ys importa desconocelos y que, en definitiva, los desprecien y traten como si fueran una colonia.
Bienvenía seya la propuesta de Teruel Existe, pero si la Xunta Xeneral nun toma bona nota y nun matiza y pondera la conceptualización municipal, nada va cambiar. Y teniendo en cuenta que, precisamente, por frente a una situación evidente n’Asturies dende hai décades, tienen que venir d’Aragón a solucionalo, poco cabe esperar de los mandaos provincianos del “Principado”.
