opinion | DAVID M. RIVAS

Asturies na vía carolinxa

  • Que Vía Carlomagno mos considere faceores d’Europa ye de xusticia.

David M. Rivas, 24 Febrero 2017

Etiquetas : David Rivas
david rivas David M. Rivas

El conceyu de l’asociación internacional Vía Carlomagno, na so última reunión de Reims, alcordara qu’Asturies entrara nel camín carolinxu. Ye una gran noticia. Considérase a Carlomagno el primer emperador d’Europa, heriede, a partes iguales, de la Romania, de la Xermania y de la Celtia. Naquellos díes había tres reinos que taben construendo lo que güei ye Europa: Francia, Inglaterra y Asturies. La Europa qu’entóncenes ñacía tuvo varios bierzos ya ún d’ellos fuera Cuadonga. Pelayo, escontra la invasión d’un potentísimu exércitu pa lo que yera la dómina, abellugárase colos fíos de les vieyes estirpes vadinienses na cueva de la diosa madre, col envís de defendela o de morrer con ella. Un pueblu poco cristianizáu llevantó la cruz como símbolu de resistencia, seguramente porque cristianos yeran los que coñocíen l’arte la guerra. Ya en Contranquil ganaran la batalla definitiva. Años más sero el gran rei d’Asturies, Adefonso II, apautara con Carlomagno. Hai autores qu’afirmen que casara cola fía del francu, Berta. Adefonso consolidara’l reinu ya enxamás tuviera interés nes tierres de más allá del Dueru, naguando por recuperar namás que les tierres de los antiguos ástures. Enxamás pensara la monarquía asturiana nes tierres de godos o de moros. Les tropes asturianes tomaron Llisboa y parte’l botín unviáronlu a Aquisgrán como recoñocimientu al emperador. Les cartes ente Adefonso y Carlomagno son munches y Beato de Llébana cruzaba idegues con Alcuino de York, conseyeru del francu. Asturies, nunca tuviera apetencies sobro Hispania.

Lo mesmo Pelayo que Fruela, lo mesmo Silo qu’Adefonso II, miraran pal norte, pa Europa. Que Vía Carlomagno mos considere faceores d’Europa ye de xusticia. Amás, mester ye saber d’ello, esta declaración pué significar un emburrión pal turismu de calidá en centros como Cangues d’Onís, la vieya capital, y Llanes y Villaviciosa, les villes griáliques. Que la historia seya rentable ye importante, pero mester ye enantes saber d’ella ensín tracamundios.

Comentarios

No hay comentarios

Para poder dejar sus comentarios debe estar logueado en la web. Registrarse

Noticias relacionadas

Equí toi, con vustedes