El debate sobro la tasa turística ye, como suel pasar n’Asturies, un sumatoriu de tonteríes y falsedaes. Vaiga por delantre qu’una tasa nun resuelve los problemes, sinón que ye un instrumentu parcial col que se pretende compensar los costes adicionales de los servicios públicos asociaos al turismu. Esto ye, que tamos delantre d’una midía necesaria anque nun seya suficiente. Nun soluciona les coses pero contribui a les arques públiques pa compensar costes esternos.
La razón que Barbón diera pa que la tasa seya municipal ye que non en toa Asturies hai “tensión turística”. ¿Tenemos qu’esperar a qué la situación “tense”, que ye’l pasu previu al colapsu?
El gobiernu asturianu, disviando con habilidá’l tiru a otros asuntos, paez mirar con simpatía la tasa pero lleva’l debate a les competencies alministratives, defendiendo que seya municipal, sabiendo perfeutamente que, nel ambiente de confrontación que mos llega de Madrid, los conceyos del PP tarán en contra. D’esta manera la discusión dexa de lláu lo importante pa centrase no aicesorio. N’España hai dos comunidaes con tases turístiques: Baleares y Cataluña, nos dos casos de competencia autonómica. Y na Unión Europea la mayoría de los miembros tienen tases, xeneralmente impuestes por gobiernos de drecha. En tolos descentralizaos la tasa ye “rexonal”, lo equivalente a “autonómica”, mientres qu’en Portugal y Francia ye municipal y en Grecia vincúlase al IVA.
La razón que Barbón diera pa que la tasa seya municipal ye que non en toa Asturies hai “tensión turística”. ¿Tenemos qu’esperar a qué la situación “tense”, que ye’l pasu previu al colapsu? ¿Nun-y daprendieran al presidente cuando neñu eso d’escarmentar en cabeza ayena? Pero ye que, con esi razonamientu, ¿por qué n’Amieva o Cabranes paguen na gasolinera la tasa ambiental si ellí nun hai “tensión ambiental”? Ye que les coses nun se miden asina. Ensín salir del oriente vemos que Villaviciosa tien 15 000 habitantes y recibe 30 000 turistes, Llanes tien 14 000 y recibe 121 000 y, Cangues d’Onís, el “top”, tien 6000 y recibe 128 000. Nun sé si esto ye “tensión” pero sí que merez una atención dalgo menos simplista. Yá hai más d’un sieglu qu’esti fenómenu se mide, al traviés del cálculu de la “capacidá de carga”, pero n’Asturies opina tol mundiu menos los científicos y por eso vamos siempres a güelpes d’ocurrencia y con debates ensín fundamentu dengún.
El Reinu Uníu vien d’aprebar unes midíes qu’entrarán en vigor el 2 d’abril: los visitantes necesitarán un visáu pa entrar nel reinu por motivos d’ociu, tando esentos los que tengan permisos de trabayu o d’estudios, o que viaxen pa participar en congresos, reuniones, esposiciones...
Dixera recientemente Ángela Pumariega, númberu ún del PP de Xixón, que la solución nun ye subir la presión fiscal. ¡Rediola!, si les tases nun entren nel cálculu de la presión fiscal y, amás, son pa turistes, que pueden ser ingleses, bávaros, xaponeses o californianos. Falar por falar y pa confundir. Y’l so xefe de files, Álvaro Queipo, propón una “bolsa de financiación” pa los conceyos turísticos, lo que significa que los turistes deterioren los espacios y sobrocarguen los servicios y paguen por ello los asturianos pero non los turistes. Eso, aparte de nun tener xacíu dengún sí que significa subir la presión fiscal o quitar fondos a otres prestaciones.
Oseya, que los asturianos pagaremos por dir a Llondres, mientres que los ingleses nun van tener tratu recíprocu por venir a Uviéu
El Reinu Uníu vien d’aprebar unes midíes qu’entrarán en vigor el 2 d’abril: los visitantes necesitarán un visáu pa entrar nel reinu por motivos d’ociu, tando esentos los que tengan permisos de trabayu o d’estudios, o que viaxen pa participar en congresos, reuniones, esposiciones... El permisu va costar diez llibres esterlines y será válidu por seyes menses siguíos y dos vegaes en dos años. Realmente, ye una tasa turística. Oseya, que los asturianos pagaremos por dir a Llondres, mientres que los ingleses nun van tener tratu recíprocu por venir a Uviéu. Yá agora los asturianos pagamos una tasa por dir a Barcelona o a Ibiza, mientres que los catalanes y baleares nun tienen un tratu recíprocu. Eso, pal presidente Barbón debe ser potestativo de los conceyos y pal presidente’l PP y la so conceyala de Xixón una intolerable suba de la presión fiscal y que meyor ye que lo paguemos, si ye mester, los propios asturianos.
