1. Pretenden poner un parque de bateríes na parroquia de Pion. Ye una barbaridá. Ye comprensible que les bateríes eses hai qu’almacenales en dalgún sitiu, pero, ¿por qué nuna collación rural? Soi vecín de Candanal, un poco más arriba de Pion. Repito: ¿por qué? ¿Porque somos más fatos? Pagamos los mesmos impuestos que los de les ciudaes y villes y nun tenemos servicios. Tampoco los pedimos, que somos bonos p’arreglamos ensín los dirixentes políticos. Pedimos poco pero tamos fartos. ¿Ye esta la forma na qu’el gobiernu asturianu, paezme que socialista, o eso dicen, quier potenciar y facer revivir les collaciones? ¿Contaminando les tierres y les augües? Augües que, por cierto, son nuestres, porque nun hai trayía municipal, anque pagamos impuestu municipal por ello, cosa sosprendente.
Lo de Carlos V o Carlos I, lo que más preste, ye de psicopatía.
2. Carlos de Gante yá tien un holograma en Villaviciosa pa modernizar la so presencia nesti conceyu. Lo de Carlos V o Carlos I, lo que más preste, ye de psicopatía. Un fulanu inútile y pendencieru, que pasó una nuechi pequí y saliera echando pestes del clima, de la tierra, de la gastronomía y de lo feísimes que yeren les muyeres (guapu yera elli, col so prognatismu) ye veneráu pol ayuntamientu. Merecemos lo de les bateríes.
Fran ye de la estirpe de los checos Beran que llegaran a Asturies pa instalar la fábrica lloza, porcelana y cristal La Bohemia, en Xixón
3. Fran Beran acaba d’espublizar “Enantes de que dexemos de conocemos”. Fran ye un bon amigu y un gran artista con una habilidá sosprendente pa plasmar cola pluma y’l pincel la personalidá del que retrata. Ye de la estirpe de los checos Beran que llegaran a Asturies pa instalar la fábrica lloza, porcelana y cristal La Bohemia, en Xixón. Esti llibru, con 186 personaxes, ye testimoniu d’una Cangues que nun quier morrer. Beran retrata un tiempu y una ciudá. Escribe: «¿qué sería d’aquel que siempres me saludaba nel bar?; sí, home, siempres con una chaqueta gris y camisa de cuadros y pidiendo un vinín de la casa; ¿cómo se llamaba?». Diz tamién que «hebo quien, al entrugái si quería salir equí, decíame que nun yera famosu nin un personax popular, que yera un simple cangués, ensín más». Pero añade Fran Beran: «esto nun ye un llistáu de cangueses importantes nin una guía de campu de los afincaos na ‘maxima sedium».
