Tan mareándomos colo asuntu de la financiación autonómica. Posiblemente les alcordaes ente Esquerra Republicana y PSC-PSOE nun vaigan a denguna parte porque choquen colos llímites constitucionales y, tamién posiblemente, incluso probablemente, que son coses diferentes, sábenlo los socialistes y los nacionalistes catalanes. Pero, seya como seya, da lo mesmo. Lo importante ye caltener esta comedia cola que trataron de poner fin a la traxedia franquista. La cosa furrulara bastante bien, especialmente cuando tóos, repito, tóos, tiraron de los tetos de la vaca europea. Unos salvaron los muebles y otros ficiéronse miyonarios. Pero paez que la cosa va llegando al final.
N’Asturies deberíamos preparamos pa una facienda confederada, que ye la que va llegar nuna década.
La España autonómica ye un edificiu que se llevantara ensín planos y que, envede arquiteutos tuviera burócrates, y envede políticos que queríen construyir un estáu democráticu tuviera chusqueros que queríen salvar lo más posible d’un estáu autoritariu. Pero tiníen una necesidá: convencer a dalgunos que nun yeran de la banda. Polo social podíen intentalo col PCE, l’únicu partíu naquel momentu y con Comisiones Obreras, la única organización social que de verdá esistía. Pero taba’l PNV y la Generalitat del esiliu. Y ETA atizando.
Nun podíen los heriedes de Franco, el rei ente ellos, reconocer les dos naciones, pero tampoco negar la evidencia. ¿Qué facer? Decidieron una autonomía pa Catañuña, reconociendo al gobiernu autónomu incluso enantes de promulgase la constitución. En puridá, la Generalitat ye la única institución llexítima d’esti reinu porque deriva de la llegalidá republicana.
Los nacionalistes catalanes, los pocos intelixentes que paecen quedar nes cúpules, marchen a la confederación porque saben que la independencia ye imposible,
Dempués vino l’arcordada col PNV, básicamente económica, como yera lo propio de los vascos col franquismu dende siempres, estendiendo un conciertu de base medieval que Franco caltuvo con Álava y con Navarra por ser “provincies lleales al alzamientu nacional”. Pujol nun quiso esi alcuerdu porque perdía perres, nun sé si Cataluña, pero sí elli, la so familia y la banca catalana.
Pero Martín Villa, el falanxista llionés, diera un pasu más: les autonomíes. Asina minimizaben políticamente a Cataluña y País Vascu, anque non económicamente, y, con tontaes como “nacionalidaes y rexones”, allá que fuéramos asturianos, canarios, gallegos ya inclusive inventaos castellano-manchegos y rioxanos.
Dende aquello tóo fora construéndose sigún intereses coyunturales. Tol estáu de les autonomíes fue desendolcándose en función de pautos partidistes del PSOE y del PP col PNV y con CIU. Esi estáu autonómicu ta muertu porque sólo ye posible pa un gobiernu, seya del color que seya, apautar con Cataluña y con Madrid. Cataluña porque condiciona la gobernabilidá, Madrid porque vive del centralismu económicu y ye un contrapesu necesariu. El PNV sabe que va haza la marxinalidá y col partíu va el País Vascu. Y los demás... ¡pa qué dicir!
Los nacionalistes catalanes, los pocos intelixentes que paecen quedar nes cúpules, marchen a la confederación porque saben que la independencia ye imposible, pero a la confederación esclusivamente económica. Los populares que gobiernen Madrid, y que seguirán conservando una comunidá que siempres fue reaccionaria aunque dalgunos la quisieron vestir de dama del “no pasarán”, ven una buena ocasión. Y los demás, pues... a obedecer, a lo que manden Génova y Ferraz.
Nun mos engañemos. Equí nin hai chantax catalán ni cesión socialista. Equí lo que pasa ye que tamos nel final llóxicu d’un modelu que nunca plantegó nin solidaridá nin igualdá, que son valores personales, non territoriales, un modelu que, al empar, despreciara a tolos países, sacantes a los que teníen perres o pistoles, o perres y pistoles.
N’Asturies deberíamos preparamos pa una facienda confederada, que ye la que va llegar nuna década. Pero pa eso, que tampoco tien por qué ser un desastre, ye mester romper col provincianismu y cola servidume voluntaria de los nuesos gobernantes. Pase lo que pase y gobierne quien gobierne, la inconsistencia del estáu autonómicu ye evidente y’l modelu ta muertu. Si los asturianos queremos sobrovivir como pueblu o, más discretamente, como una sociedá con sanidá y educación, nun mos queda otra que romper col papel que mos dieron n’España hai cincuenta años.
