Eurovisión
Reconozo que, si me cuadra tar en casa, veo’l Festival d’Eurovisión. Y falo de “reconocelo” porque tal paez que ta mal visto nun home cultu y que va a conciertos de Mozart. Igual ye que lu llevo na memoria reptiliana, de cuando yera neñu y viera a Massiel ganar col so “La, la, la”, que mos ponía n’Europa. Más lluéu dime cuenta que yera un premiu a Franco pol aperturismu económicu y dexar de fusilar tanto. Pero préstame. Primero porque me lleva a la neñeza y a l’adolescencia, a esi mundiu dulzón que, la verdá, nun lo yera tanto. Pero hai más coses. Aparte de que m’entero de dalgunes músiques que desconozo, ye un verdaderu fenómenu sociolóxicu. Y esti añu tenía los asuntos, morbosos ellos, del boicot a Israel y la descalificación d’Olanda.
Hai una cosa que paez un poco estraña: los doce votos populares d’España fueron a Israel.
Cada vuelta que veo Eurovisión, que nun ye siempres, faigo la mio quiniela, non por posibilidaes de la canción, que sé mui bien cómo ye lo de los votos, los profesionales y los populares: los profesionales por intereses y los populares sigún ónde hai más inmigrantes. Los profesionales respuenden a custiones comerciales y polítiques porque, al tar vinculaos a les televisiones públiques, responden, con mayor o menor disciplina, al gobiernu de turnu. Tolos que tenemos unos años mos recordamos de qu’España siempres votaba a Portugal y Portugal a España. Coses de dictadures. Agora añadiérase un votu telemáticu popular y esi votu introduz otros matices: si se presenta Portugal hai munchu votu de Lluxemburgu y de Suiza, si lo fae Rumanía hailu munchu d’España, si lo fae Turquía hailo d’Alemaña... Tamién hai votos “étnicos”: Alemaña-Austria, Suecia-Noruega, Grecia-Chipre, Serbia-Croacia, como nunca Armeña votará a Turquía y les repúbliques asiátiques que fueron soviétiques vótense unes a otres. El casu ye que nunca nun acierto col ganador. Esti añu la mio papeleta fue esta: 1 Francia, 2 Israel, 3 Armenia, 4 Portugal, 5 España.
Taba cantao: ganaría la canción que yo nun pensaba. A mín, personalmente, la canción de Suiza nun me gusta. Acercárame un poco con Francia: poníala como primera y quedó la cuarta. El votu profesional fora un votu políticamente correutu. Nun ye razonable que los comentaristes de TVE repitieran una ventena vegaes qu’el cantante yera “non binariu”. ¡Pues como si ye inxenieru o pastor! Y’l popular respondiera, como yera d’esperar, a la situación política. Una gran parte de los europeos votaron por Ucraña, mientres que la comunidá xudía movilizárase pa qu’Israel nun apaeciera como’l gran derrotáu y, asina, minimizar el boicot que se quixo facer.
Vuelvo a reafirmame, un añu más, en qu’el Festival d’Eurovisión ye un llaboratoriu d’investigación sociolóxicu, antropolóxicu y económicu d’Europa como mui pocos.
Hai una cosa que paez un poco estraña: los doce votos populares d’España fueron a Israel. Sábese qu’España ye, de los países europeos, ún de los más propalestinos, anque tamién tien la carauterística de nun ser antixudíu. Pesie a la lleenda negra, nunca fue un país antisemita, a lo menos nos dos últimos sieglos, incluso cuando’l réxime fascista. Amás, la comunidá xudía ye mui pequeña, incapaz de modificar un votu telemáticu de cientos de miles de persones. ¡Igual los españoles votaron a la canción!
Falemos d’otru asuntu. Una de les coses más interesantes del Festival d’Eurovisión ye que, por frente a lo que venía pasando nos últimos años, l’inglés va retrocediendo y les llingües propies afirmándose. Esti añu fueron 15 los países que cantaron nuna llingua propia, nuna de les munches que tienen la mayoría d’ellos: Armeña, Chipre, Esloveña, España, Estoña, Francia, Grecia, Irlanda, Italia, Llituaña, Noruega, Portugal, Reinu Uníu, Serbia y Ucraña. Los que cantaron n’inglés ensín ser esa una llingua propia fueron 10: Alemaña, Austria, Croacia, Finlandia, Israel, Lletoña, Lluxemburgu, Suecia, Suiza y Xorxa.
Vuelvo a reafirmame, un añu más, en qu’el Festival d’Eurovisión ye un llaboratoriu d’investigación sociolóxicu, antropolóxicu y económicu d’Europa como mui pocos.