Nes Canaries hai movilizaciones mui numberoses contra la masificación turística, embaxo la consideración de que la teórica riqueza que dexa esi seutor conlleva que les islles tienen les ratios más altes de paru, sueldos baxos y riesgu de probitú. D'otru lláu, l'incrementu'l parque de pisos turísticos obliga a los vecinos a abandonar los sos llugares de residencia. De fechu, los pisos turísticos aumentaron nos últimos dos años nun cuarenta por cientu.
¿Y n'Asturies? L'alcalde d'Uviéu, Alfredo Canteli, diz que na so ciudá "agora nun hai problema colos pisos turísticos". ¡Home!, si encomparamos Uviéu col Mediterrániu o colos archipiélagos, caro que non. En Baleares l'encarecimientu los alquileres fue nel últimu añu del ochu por cientu, cifres asemeyaes a les de Madrid. La diferencia ye que Madrid ye mui grande y nun acaba pasando lo que pasa, por exemplu, n'Ibiza, onde los funcionarios, dende mélicos y mayestros a fiscales y guardies civiles procuren marchar d'ellí lo enantes posible y, si pueden, nun dir. Lo mesmo ta pasando en Roma, en Barcelona, en Llisboa... Un casu emblemáticu ye Lagunillas, el barriu de la Cruz Verde, nel centru de Málaga. Yá cuásique nun hai población llocal, siendo nes sos cais los malagueños una "especie n'estinción". Un arquiteutu de la ciudá andaluza decía hai poco que "los pocos comercios que queden serán franquicies".
Evidentemente, la cosa nun ye tan grave n'Asturies, anque na Cimavilla de Xixón empieza ponese crudo. Y, ¿qué vamos facer?, ¿esperar a que seya irreversible? ¿Nun deberíamos preparar midíes pa que la barbaridá nun mos llegue? ¿Nun ye eso la misión de los xestores públicos?
Mester ye poner les coses nos sos xustos términos. Sigún l'últimu informe d'Exceltur, qu'aconceya a les trenta empreses más relevantes de la cadena de valor turística (tresportes, axencies, tour operadores, tarxetes de pagu...), Uviéu y Xixón son les ciudaes con más aumentu de pisos turísticos. Por si fuera poco, Katia Domingo, presidenta de la Unión d'Inmobiliaries d'Asturies, afirma que "enantes invertíase en viviendes p'alquilar y agora pa dedicalo a pisu turísticu". Tenemos más datos. El departamentu d'urbanismu de Xixón recibe una media d'ochenta solicitúes pa llegalizar pisos turísticos cada día, y nun hai namás qu'una selmana una empresa facía pública la so intención de xestionar cien pisos turísticos n'Avilés ente 2024 y 2026.
De fechu, paez ser qu'el gobiernu asturianu ta preocupáu pol asuntu, porque la suba constante de los alquileres pola presión de los pisos turísticos puede alterar gravemente'l mercáu. La vicepresidenta Gimena Llamedo decía hai unos díes que taben viendo "si l'usu turísticu afleuta a la disponibilidá de viviendes pa los xóvenes". Pero, ye pa entrugase, ¿qué tienen que mirar? ¿Van facer una investigación encargándolo a la Universidá de Harvard? ¡Pero si ta estudiadísimo! Ye más: esa fue la razón pa que los neofascistes arrasaran n'Algarve nes últimes elleiciones portugueses. Un turismu masivu que presiona nos alquileres, una manu d'obra inmigrante que va a la hostelería y tamién presiona nos alquileres. Y los mozos llocales ensín vivienda. Xuntose con topose: vivienda y xenofobia. Y los mozos apuntaos a la camisa parda. Ye que les coses nun salen porque sí y les custiones hai qu'estudiales bien.
Inclusive Xapón, que nun tien demasiao turismu y que pesa poco nel so PIB, unu por cientu o asina, yá ta llexislando sobro l'asuntu, con impuestos especiales, llímites a determinaos tipos de turismu y ata prohibición d'entrar en determinaos barrios y pueblos. El gobiernu xaponés nun va esperar a que les coses seyan irreversibles. Notros sitios, más llistos seguramente, ye bastantina con decir: "equí tovía nun hai problema".
Hai un "lobby" perpoderosu n'Asturies, una poder fáuticu mui lligáu al poder políticu, especialmente al municipal, que ye tan fuerte como lo fueran hai décades les mineres, les navieres, les siderúrxiques y les navales. Nun ye otru qu'el, parafraseando a Eisenhower, el "complexu hosteleru-tresportista". Ye'l grupu d'interés que potencia, arrastrando a unos alcaldes de mui baxa formación y menor visión, un turismu masivu, ofreciendo lo que seya con tal que dea perres, anque desfaigan pueblos y mescaben cadarmes culturales. Hai que tener cientos de trenes, docenes d'aviones, decenes de cruceros... El casu ye llenar los establecimientos.
En fin... Ye qu'ata un home como Federico González Tejera, primer executivu de Radisson y Louvre, con más de diez mil centros hoteleros en tol mundiu, diz que ser un destín turísticu nun tien por qué ser simplemente "un llugar al que va muncho xente". Y añade que nun hai por qué imponese llegar a un númberu de turistes porque, pa él, "el númberu tendría que ser lo último".
