opinion | DAVID M. RIVAS

Polos que vienen mañana, seyamos sensatos

  • Los aldeganos siguen siendo los que producen alimentos y agora yá viven como los obreros y autónomos de les ciudaes

David M. Rivas, 28 Febrero 2017

david rivas David M. Rivas

Asturies ye’l país d’Europa con más tarrén agrariu públicu y comunal. Ye más del cuarenta por cientu l’espaciu. La mayor parte ye forestal y de pastos. Ye mester caltener esta bayura ya’l centru l’asuntu ye’l campesín, l’aldeganu. Nun hai que ponese a idealizar la vida n’aldega, que yá sabemos que “pueblu pequeñu, infienru grande”. Non, nun ye eso. Pero sí que tenemos ser conscientes de qu’el campu nun ye namás qu’un seutor productivu, cada vuelta menos en munchos llugares, sinón otra cosa perdistinta. Hebo un tiempu nel que tábamos escontra una custión agrícola: yera necesario sacar de la tierra los alimentos pa una población urbana creciente. Dempués, o al empar, viniera la custión campesina: los aldeganos tiníen que gociar de les mesmes comodidaes y de la mesma renta que los trabayadores de les ciudades. Les dos coses, la custión agraria y la custión campesina, llográranse en xeneral, con mayor o menor suerte asigún los países. Güei tamos dando un saltu ya entrando nuna nuea dómina, la de la custión rural. Los aldeganos siguen siendo los que producen alimentos y agora yá viven como los obreros y autónomos de les ciudaes y, dalgunes vegaes, meyor. Pero agora son los xestores del ecosistema, los que caltienen el paisax. La riqueza más grande d’Europa nun ta nes biesques nin nos altos picos, sinón nesa frontera ente lo agropecuario y lo ñatural. Ya esa frontera ye problemática. Hai oveyes y cabres, pataques y pumaraes, caballos y abeyes, osos y llobos, pites y raposos, maizales y xabariles. Y, torno al entamu, con un cuarenta por cientu de les tierres comunales y públiques. Tenemos un gran retu per delantre. Nun podemos idealizar al paisanu. Tampoco podemos idealizar al osu o al llobu. Ye mester tener intelixencia, bona fe ya estudios. Tamos xugando cola vida de los nuesos fíos y ñetos. Tamos xugando con Asturies, esti país tan vieyu.

Comentarios

No hay comentarios

Para poder dejar sus comentarios debe estar logueado en la web. Registrarse

Noticias relacionadas

Asturies na vía carolinxa