opinion | DAVID M. RIVAS

Sesenta años

  • Ye hora de facer Europa

David M. Rivas, 28 Marzo 2017

david rivas David M. Rivas

El 25 de marzu de 1957 los representantes de seyes gobiernos firmaben un documentu en Roma. Pretendíen poner fin a sieclos de guerres y conflictos n’Europa, tres la más sangrienta dómina de la so historia, la que diba de 1914 a 1945. Na Roma de los césares les dos grandes potencies alfrentaes dende el sieclu XVIII afitaben les bases pa un futuru distintu. Monet ampliaba la idega de la república pa toa Europa y Adenauer aceutaba la heredá y la vergoña del nazismu y arrenunciaba a una Europa xermanizada. Taba ñaciendo lo que güei llamamos Unión Europea. Güei llega la Europa unida a cumplir sesenta años con más esmolecimientu pol futuru que cola satisfaición del camín andáu. Dempués de varies ampliaciones y d’unos ésitos evidentes, Europa ye güei la primer potencia económica mundial y, dende lluéu, un espaciu de llibertaes únicu nel mundiu, fiel a los tres principios de la revolución: llibertá, igualdá, fraternidá. Pero l’horizonte ye mui otru. El Reinu Uníu, incómodu sociu pero de vital importancia, decidiera marchar; un populismu antidemocráticu espárdese elleición tres elleición; la incompetencia en política esterior ye custión enfermiza. Un euroescepticismu percuerre la unión y tóo paez francer. Pero ye la hora de, escontra l’ablayamientu, volver mirar, actualizándolos, pa los principios fundacionales. Necesitamos más Europa nesti momentu, y meyor Europa. Ye mester una Europa más democrática, más integradora, más plural na so unidá. Ye hora de que los estaos cedan tola so soberanía pa una política única llaboral, fiscal, diplomática y militar. Ye hora de facer lo único que puede evitar la nuesa decadencia y, a la postre, muerte. Ye hora de facer Europa.

Comentarios

No hay comentarios

Para poder dejar sus comentarios debe estar logueado en la web. Registrarse

Noticias relacionadas

Oreyes y raos